*JARDUERA HONETAN KULTURA BONUA 2026 EZIN DA ERABILI.

Olaia Inziartek zuzeneko hurbila, intimoa eta zaindua eskaintzen du, espazio eta formatu desberdinetara egokitzen dena. Horren erakusgarria izango da IAK – Izaskun Arrue Kulturgunean emango duen kontzertua, oraingo honetan, formatu txikian eta akustikoan. Aukera ezin hobea azken urteotan gure eszenan gehien hazi den artistetako bat ikusteko; berrikuntza eta sentsibilitatea uztartzen dituen proposamen propioa finkatzen ari dena. Olaia Inziarteren musikan, euskara eta egunerokoaren hitzak dira erdigunea, zaurgarritasunaren indarra eta egiaren bilaketa etengabean aritzen.

Olaia Inziarte | Abeslari eta kantugile nafarra da, euskarazko eszenako ahots bereizgarrienetako bat. Bakarkako ibilbideari hasiera eman zion Lehengo Lepotikan Burua (2022) diskoarekin, non folk ukituak eta elektronika nahastu zituen, giro intimo eta gertukoa eraikiz. Disko honekin MIN sarietan Euskaraz egindako disko onenaren izendapena jaso zuen. 2025ean Zerrautsa eta Zura kaleratu ditu: natura eta barne-mugimendua ardatz dituen lana, “zura” sendotasunaren ikur eta “zerrautsa” hauskortasunaren arrasto gisa ulertuta. Ahots gozo bezain indartsuarekin, melodia garbiak eta erritmo minimalistak ehuntzen ditu, testu zainduen eta emozio zuzenen eskuetara.